Një linjë kamionësh të Gardës Kombëtare Meksikane dhe të Ushtrisë janë vendosur përgjatë kufirit SHBA-Meksikë, ndër të parët nga 10,000 trupat që Meksika dërgon në kufirin e saj verior pas kërcënimeve tarifore nga presidenti amerikan, Donald Trump.
Anëtarët e maskuar dhe të armatosur të Gardës Kombëtare u panë të patrullonin pengesën kufitare në periferi të Ciudad Juarez.
Patrulla u panë edhe në pjesë të tjera të kufirit pranë Tijuanës.
Bëhet e ditur se kjo lëvizje vjen pas një jave të trazuar përgjatë kufirit pasi Trump njoftoi se do të vononte tarifa ndaj Meksikës për të paktën një muaj, shkruan AP, përcjell Telegrafi.
Në këmbim, presidentja meksikane Claudia Sheinbaum premtoi se do të dërgonte Gardën Kombëtare të vendit për të përforcuar kufirin dhe për të goditur kontrabandën e fentanilit.
Trump ka shpallur një emergjencë në kufi, pavarësisht niveleve të migracionit dhe mbidozave të fentanilit që janë ulur ndjeshëm gjatë vitit të kaluar.
Shtetet e Bashkuara thanë se nga ana e tyre do të bënin më shumë për të ndaluar trafikimin e armëve amerikane në Meksikë.
“Do të ketë mbikëqyrje të përhershme në kufi”, tha Jose Luis Santos Iza, një nga drejtuesit e Gardës Kombëtare. /Telegrafi/