Aksioni për Nëna dhe Fëmijë (AMC), në bashkëpunim me organizatën ndërkombëtare Americares, ka dhuruar një donacion jetik në vlerë rreth 550,000 euro me medikamente për trajtimin dhe menaxhimin e diabetit të tipit 2.
Donacioni është i dedikuar për Klinikën e Endokrinologjisë në Qendrën Klinike Universitare të Kosovës (QKUK). Ky donacion përfaqëson një hap të rëndësishëm në përmirësimin e kujdesit shëndetësor për pacientët me diabet në Kosovë.
Diabeti në Kosovë – Një sfidë e madhe shëndetësore
Diabeti tip 2 është forma më e përhapur e diabetit, duke përfshirë rreth 95 për qind të rasteve dhe duke ndikuar drejtpërdrejt në cilësinë e jetës së pacientëve.
Numri i pacientëve me diabet është në rritje të vazhdueshme, për shkak të faktorëve të ndryshëm, si stili i jetesës sedentare, ushqyerja e pashëndetshme dhe mungesa e aktivitetit fizik. Kjo rritje përbën një sfidë të madhe për sistemin shëndetësor të vendit, i cili shpesh përballet me mungesë të kapaciteteve infrastrukturore mjekësore.
Sipas të dhënave të Institutit Kombëtar të Shëndetit Publik të Kosovës, vetëm gjatë vitit 2022 janë regjistruar 7,302 raste të reja të diabetit tip 2, nga të cilat 4,475 raste i përkisnin grave dhe 2,827 raste burrave.
Ndikimi i Donacionit në Jetën e Personave me Diabet
Donacioni i siguruar nga AMC dhe Americares përfshin një sasi të konsiderueshme të medikamenteve esenciale për menaxhimin e nivelit të glukozës në gjak dhe për parandalimin e komplikimeve të rënda të diabetit. Ky donacion do të lehtësojë jetën e pacientëve që janë të hospitalizuar duke u siguruar atyre trajtim të sigurt dhe cilësor.
Duke reduktuar mungesën e medikamenteve në spitale, ai lehtëson punën e profesionistëve shëndetësorë, duke i ndihmuar ata të ofrojnë shërbime më efektive dhe trajtime më cilësore për pacientët. Kjo do të ndikojë ndjeshëm në përmirësimin e cilësisë së kujdesit shëndetësor dhe në uljen e rasteve të ndërlikimeve të diabetit.
“Ky donacion është i domosdoshëm për pacientët me diabet tip 2, veçanërisht duke pasur parasysh numrin në rritje të personave të prekur nga kjo sëmundje. Jemi jashtëzakonisht mirënjohës dhe falënderues për këtë donacion të çmuar – tha znj. Afërdita Kukaj, kryeinfermiere në Klinikën e Endokrinologjisë.
Angazhimi i AMC për Kujdes Shëndetësor më të Mirë
Aksioni për Nëna dhe Fëmijë është një organizatë jofitimprurëse e përkushtuar në shpëtimin e jetëve dhe përmirësimin e shëndetit të foshnjave, nënave dhe fëmijëve në Kosovë. Përmes projekteve dhe partneriteteve me organizata ndërkombëtare, AMC synon të ofrojë zgjidhje të qëndrueshme për sfidat kryesore të sistemit shëndetësor, duke përfshirë sigurimin e qasjes në barna dhe shërbime cilësore për komunitetet më të cenueshme.
AMC dhe partnerët e saj do të vazhdojnë të mbështesin përpjekjet për të siguruar një sistem shëndetësor më të fortë, ku çdo pacient ka mundësinë të marrë trajtimin e nevojshëmy donacion është një dëshmi e përkushtimit të AMC për të ndihmuar komunitetin dhe për të sjellë ndryshime të prekshme në jetën e qytetarëve të Kosovës.
Ky donacion është një tjetër hap i rëndësishëm drejt përmirësimit të shëndetit të popullatës dhe një shembull konkret i solidaritetit dhe përkushtimit për një Kosovë më të shëndetshme.
Për më shumë informata, ju lutemi kontaktoni:
Aksioni për Nëna dhe Fëmijë (AMC)
Email: info@amchealth.org
Website: www.amchealth.org
Tel: +383 49 110 333