Media online “Sbunker” ka bërë të ditur se sot ka qenë cak i një sulmi kibernetik të koordinuar dhe të sofistikuar.
Në njoftimin e kësaj medie në faqen e tyre në Facebook, thuhet se uebfaqja është kthyer por megjithatë përmbajta e saj është komprometuar.
“Sbunker dëshiron të informojë publikun se sot, më 16 korrik, faqja e tij www.sbunker.org pësoi një sulm kibernetik të koordinuar dhe të sofistikuar. Uebfaqja është kthyer dhe po punojmë për të rikuperuar përmbajtjen e cila është komprometuar përkohësisht. Megjithëse qemë në gjendje të ruanim shumicën e përmbajtjes sonë, sulmuesit arritën të fshijnë përmbajtjen e katër muajve të fundit.
Vlerësimi i plotë i dëmeve të shkaktuara nga ky operacion keqdashës është ende në vazhdim. Megjithatë, duke gjykuar nga përmasat dhe sofistikimi i sulmit, mund të konkludojmë se ky operacion u krye nga një grup profesionistësh”, thuhet në njoftimin e tyre.
Lidhur me këtë rast ka reaguar edhe Asociacioni i Gazetarëve të Kosovës.
AGK-ja e ka dënuar sulmin dhe duke theksuar se këtë e sheh si përpjekje kundër lirisë së medies dhe shprehjes në Kosovë.
“AGK-ja e fton Njësinë Kibernetike të Policisë së Kosovës që të hetojë rastin me prioritet dhe ta informojë medien në fjalë për rezultatin e hetimeve”, thuhet në reagim. /Telegrafi/