Të dielën, më 4 Gusht, duke filluar nga ora 11:00, në fshatin magjepsës të Bogës, u mbajt edicioni i 33-të i “Lojërave Tradicionale – Rugova 2024”.
Në një botë ku modernizimi shpesh eklipson traditat, “Lojërat Tradicionale – Rugova 2024” ofrruan një mundësi unike për të rikujtuar dhe përjetuar ato vlera që na bëjnë të veçantë si komb.
Me lojëra si mundje, hudhja e llastarit, ngjitje në shilor, hudhja e gurapeshit, tërheqja e litarit dhe kërcimi pup, kjo ngjarje ishte një pasqyrë e shpirtit të gjallë dhe të fuqishëm të kulturës shqiptare.
Mundja, një nga lojërat tradicionale që ka sjellë së bashku burrat më të fortë të kombit tonë për shekuj me radhë, shërbeu si një testim ku aftësitë fizike dhe strategjia e garuesëve u testuan duke triumfuar më të mirët.
Fuqia dhe preciziteti i hudhjes së llastarit, një lojë që kërkon forcë dhe teknikë, u bë simbol i përkushtimit dhe durimit që karakterizon popullin tonë.
Ngjitja në shilor është një provë e guximit dhe balancës. Një nga garat më të vështira, ku ngjitja në majë të shilorit kërkon një kombinim të shkathësisë dhe vendosmërisë, garuesit e përfunduan me sukses!
Të pranishmit që menduan se e kanë saktësinë e nevojshme, provuan hudhjen e gurapeshit. Kjo lojë kërkon një kombinim të fuqisë dhe saktësisë për të arritur një rezultat të suksesshëm.
E gara tjetër me tërheqjen e litarit nuk është ishte vetëm një provë e forcës, por edhe e bashkëpunimit dhe strategjisë. Ekipet garuan për të treguar se cila është më e fuqishme dhe më e koordinuar.
Në fund, kërcimi pup ishte një garë që solli shumë gëzim dhe argëtim në zemrat e garuesëve dhe të pranishmëve përreth.
Përveç emocionit dhe argëtimit që ofrojnë këto gara, pjesëmarrësit patën mundësinë të fitojnë çmime të ndryshme dhe të krijojnë kujtime të paharrueshme me familjen dhe miqtë.
Ky manifestim ishte një mundësi e shkëlqyer për të kaluar një ditë të veçantë në natyrën e mrekullueshme të Rugovës, duke përjetuar një ditë plot tradita, kulturë dhe argëtim.
Regjistrimi për të marrë pjesë në garat e “Lojërat Tradicionale – Rugova 2024” ishte FALAS!
Të gjitha lojërat tradicionale u përcjellën nga shumë vizitorë që kishin shkuar posaçërisht në Bogë për këtë ngjarje!