Drita dhe Ballkani kanë barazuar në kuadër të javës së 34-të në Superligën e Kosovës.
Vendasit e filluan më mirë takimin, duke rrezikuar me anë të Festim Alidemës, mirëpo goditjen e tij e priti portieri Damir Luljanovic.
Skuadra nga Theranda më pas filloi të këndellej dhe në minutën e 15-të, krijoi një shans të mirë përmes Blend Baftiut, por që goditja ishte e pasaktë.
Ishte minuta e 18-të, kur erdhi goli i parë i takimit, që u shënua për Dritën nga Xhevdet Shabani që shënoi një gol të bukur.
Por, Ballkani i barazoi shifrat në 1-1, fal një asistimi nga Ermal Krasniqi për Mirlind Dakun që shënoi nga afërsia.
Në 45 minutat e dytë, nuk munguan shanset e mira, por rrjetat mbetën të paprekura.
Alidema qysh në minutën e 47-të rrezikoi portën mysafire, mirëpo goditja e tij shkoi vetëm mbi portë.
Shans të mirë pati edhe Ardian Cuculi (58′), e në vend ishte Dami Luljanovic që ndaloi goditjen e mbrojtësit.
Deri në fund, dy skuadrat u mbrojtën mjaftë mirë, duke bërë që ky takim të përfundonte me barazim, 1-1.
Pas javës së 34-të, Drita është në vendin e dytë me 70 pikë, derisa Ballkani në të tretin me dy më pak. /Telegrafi/