Mbyllen nëntë lokale në Ferizaj – dyshohen për trafikim me qenie njerëzore

Mirjeta Hajzeraj

4 years ago

Inspektorati i Komunës së Ferizajt ka mbyllur mbrëmë nëntë lokale, me dyshim se ushtronin veprimtari deviante.

Në njoftimin e bërë për media nga Komuna e Ferizajt thuhet se këto lokale nuk kishin as dokumente përkatëse, transmeton Telegrafi.

“Mbrëmë, pas një aksioni të mirë koordinuar mes Inspektoratit të Komunës, Njësisë së Hetimit të Trafikimit me Qenie Njerëzore, inspektorëve të ATK-së dhe inspektorëve të punës, pas inspektimeve që u zhvilluan në rrugët “Kemajl Hetemi”, “Qamil Ilazi”, “Mejdi Xhaferi”, “At Nik Prela” dhe “Shën Tereza” në 11 subjekteve gastronomike, 9 prej tyre u mbyllën si pasojë e mos posedimit të dokumenteve përkatëse, kushteve higjieno-teknike, mosrespektimit të udhëzimeve mbrojtëse ndaj COVID-19 dhe mbi të gjitha mbi bazën e dyshimit të arsyeshëm për zhvillimin e veprimtarive deviante”, thuhet në njoftim.

Më tej në njoftim thuhet se ky aksion i inspektorëve do të vazhdojë edhe ditëve në vijim.

“Ky aksion i Inspektorëve të Ferizajt do të vijoj edhe ditëve e javëve në vijim, në gjithë territorin tonë, për të vënë ligjshmërinë e zbatimin e rregullit në subjekte afariste që nuk përmbushin këto kushte. Për këtë aksion dhe të tjera të zhvilluara në vazhdimësi, Inspektorati i Komunës, falënderon Policinë e Kosovës, Njësinë e Hetimit të Trafikimit me Qenie Njerëzore, Stacionin Policor në Ferizaj, inspektorët e ATK-së dhe inspektorët e punës për asistimin e vazhdueshëm në kontrolle të tilla”./Telegrafi/