Të çash mbrojtjen e Juventusit është një mision i pamundur edhe për një skuadër si Barcelona që ka në arsenalin e saj një bombë sulmi si e famshmja MSN.
Në “Camp Nou”, “Zonja e Vjetër” tregoi të gjitha aftësitë në çaktivizimin e kësaj bombe duke mos e lejuar në asnjë moment që të shënojë në portën e Buffon duke fituar me meritë të plotë kualifikimin për në gjysmëfinale të Liga e Kampionëve.
Juventus në 10 ndeshje të evenimentit më të rëndësishëm evropian ka pësuar vetëm 2 gola, shifra këto që tregojnë edhe njëherë për forcën që ka kjo skuadër në prapavijë.
Të vetmit që kanë mundur të mposhtin legjendën Buffon janë Tolisso në Lion-Juventus që u mbyll 1-1 dhe Nico Pareja në Sevilla-Juventus e mbyllur 3-1 për bardhezinjtë.
Në “Camp Nou” sfida mes Barcelonës dhe Juventusit përfundoi 0-0 diçka e rrallë kjo për skuadrën katalanase.
Ndërsa Juventusin ky rezultat e çoi drejt një rekordi me “Zonjën e Vjetër” që nuk pëson gol prej 531 minutash në Ligën e Kampionëve, koha më e gjatë me portë të paprekur për të deri në këtë moment.
Në mesditën e së premtes në Nyon do të hidhet shorti i gjysmëfinaleve nga ku do të dalë edhe rivali i fundit i bardhezinjve në rrugëtimin drejt finales së 3 qershorit në “Millennium Stadium” të Cardiffit.
