Mbetjet e supozuara njerëzore thuhet se janë gjetur brenda rrënojave të zhytëses “Titan”, thotë Roja Bregdetare e SHBA-së.
Pjesë nga nëndetësja, e cila “shpërtheu” në një zhytje të thellë drejt Titanikut, u shkarkuan në St John’s, Kanada, të mërkurën, shkruajnë mediat e huaja, përcjell Telegrafi.
Profesionistët mjekësorë amerikanë do të kryejnë një analizë zyrtare të mbetjeve të supozuara, tha roja bregdetare në një deklaratë.
Agjencia është në fazat e hershme të një hetimi për shkaqet e katastrofës dhe Bordi Detar i Hetimit të Rojës Bregdetare (MBI) do të transportojë provat në një port amerikan për analiza dhe testime të mëtejshme.
Kreu i MBI-së, kapiteni Jason Neubauer, tha në një deklaratë se “kishte ende një punë të konsiderueshme për t’u bërë për të kuptuar faktorët që çuan në humbjen katastrofike të Titanit dhe për të ndihmuar që një tragjedi e ngjashme të mos përsëritet”.
Të pesë personat në bordin e “nëndetëses” vdiqën më 18 qershor pasi ajo shpërtheu – teksa ishte në rrugëtimin e saj për të parë mbetjet e anijes së famshme në vitin 1912, e cila ndodhet në një thellësi prej 3,800 metra në Atlantikun verior.
Pasagjerët ishin kreu i OceanGate, i cili organizoi zhytjen, 61-vjeçari Stockton Rush; Eksploruesi britanik Hamish Harding, 58 vjeç; Shahzada Dawood, 48 vjeç, dhe djali i tij, Suleman Dawood, 19 vjeç; dhe zhytësi francez Paul-Henry Nargeolet, 77 vjeç. /Telegrafi/