Ministria e Arsimit dhe Shkencës po përgatit rekomandime për shkollat me qëllim rritjen e sigurisë në objekte, si dhe uljen e dhunës së bashkëmoshatarëve.
Nga MASH thonë se bazë e procesit janë konkluzionet që kanë dalë nga takimet e mëparshme me profesorë universitarë dhe ekspertë të fushës, nga takimet me përfaqësues të institucioneve të tjera të interesuara, si dhe nga vizitat në shkolla, ku së bashku me stafin mësimdhënës dhe shërbimet profesionale është analizuar gjendja e sigurisë.
“Pas finalizimit të rekomandimeve, ato do t’i përcillen qeverisë dhe do të miratohen në seancën e ardhshme. Ndërkohë, çdo propozim konstruktiv është i mirëpritur dhe mund të jetë pjesë e planit për ruajtjen e paqes dhe sigurisë në shkolla dhe në ndërtimin e një mjedisi ku nxënësit do të fokusohen vetëm në përvetësimin e njohurive dhe aftësive dhe dhuna nuk do të jetë temë”, thonë nga MASH.
Gjithashtu shtojnë se MASH vijon me procesin e konsultimit, me përfshirjen e disa aktorëve socialë, të cilët mund të ndihmojnë në krijimin e protokolleve gjithëpërfshirëse për rritjen e sigurisë në shkolla dhe manualeve për trajtimin në rast të zbulimit të dhunës në mes bashkëmoshatarëve./Telegrafi/