Kryetari i Shoqatës së Gastronomëve, Petrit Kllokoqi ka ftuar gastronomët që nesër të protestojnë kundër masave të reja kundër coronavirusit.
Kllokoqi ka njoftuar se protesta do të zhvillohet para Qeverisë, në ora 21:30, transmeton Telegrafi.
“Nesër, e diele, ora 21:30, ftoj të gjithë gastronomët që të dalim para Qeverisë, duke i marrë automjetet tuaja për të protestuar kundër masave të reja, me sirena! Kundërshtojmë masat duke e ruajt shëndetin publik”, ka thënë ai.
Ndryshe, Qeveria e Republikës së Kosovës në mbledhjen e mbajtur sot ka marrë vendim për lehtësimin e masave anti-COVID.
Qeveria ka vendosur që të zgjatet orari i lëvizjes për qytetarë dhe orë policore të ketë pas orës 24:00.
Po ashtu, sektori i gastronomisë lejohet të punojë deri në ora 23:00, kurse bartja e maskave mbetet obligative.
“Në bazë të rekomandimeve të dhëna nga Instituti Kombëtar i Shëndetësisë Publike të Kosovës, ministritë e linjës, palët e interesit dhe ekspertët përkatës u miratua vendimi i ri për masat e përgjithshme dhe të veçanta për kontrollin, parandalimin dhe luftimin e pandemisë COVID-19”, thuhet në vendimin e Qeverisë. /Telegrafi/
