Federata e Futbollit të Maqedonisë (FFM) ka zgjedhur presidentin e ri për mandatin e ardhshëm katërvjeçar, njofton Telegrafi.
Masar Omeragiç ishte kandidati i vetëm dhe u zgjodh unanimisht dhe me aklamacion nga organi më i lartë i futbollit të Maqedonisë. Ai e trashëgon mandatin nga Muhamed Sejdini, i cili e drejtoi federatën që nga viti 2017. Kryetari i shtatë i FFM-së kandidaturën e ka marrë në fund të vitit të kaluar, ndërkohë federatën e drejtoi deri në këtë kuvend, kur mori mandatin e plotë.
Ndryshe, bëhet fjalë për një njeri që ka vite që është pjesë e futbollit – fillimisht si futbollist, e më pas edhe si punëtor futbolli.
Pas zgjedhjeve, presidenti i ri iu drejtua delegatëve dhe mediave.
“Ne nuk jemi këtu vetëm për të folur për problemet e së kaluarës – por për të parë përpara, drejt një vizioni dhe strategjie të re për futbollin në Maqedoni. Federata e Futbollit të Maqedonisë ka për obligim të vendosë një drejtim të qartë, të krijojë një sistem që do të garantojë zhvillim afatgjatë dhe do të kthejë besimin tek të gjithë ata që janë pjesë e këtij sporti. Vizioni ynë është i qartë: Futboll i fortë në Maqedoni, i organizuar dhe konkurrues në të gjitha nivelet:, ka thënë Omeragiç.
Me emërimin e Masar Omeragiçit në krye të Federatës së Futbollit të Maqedonisë, Drilon Ganiu u zgjodh Sekretar i Përgjithshëm i FFM-së. /Telegrafi/