Të mbijetuarit dhe dëshmitarët e masakrave serbe gjatë luftës në Kosovë, vazhdojnë t’i rrëfejnë tmerret që panë dhe përjetuan.
Sami Parashumti, rrëfen tmerrin e masakrës së Gjakovës, ku nga familja Caka, vetëm një djalë arriti të shpëtonte.
Ai tregon ngjarjen në mënyrë kronologjike dhe tmerrin që kishin përjetuar nga vrasja barbare e ushtrisë serbe ndaj civilëve shqiptarë.
“Në lagjen tonë, kur na kanë rënë, në 12:10 të natës, janë dëgjuar vetëm krisma. Me pa nuk është parë asgjë, krismat edhe piskamat e familjeve Vesa. Janë kanë diku 21 anëtarë më duket. Aty kemi dëgjuar piskamat, kur janë dëgjuar krismat, piskamat janë ndalë. Atëherë ka filluar t’i dalë flaka shtëpisë, i kanë marr nga marketi i kanë dërguar në shtëpi. Kur kanë hy në shtëpi është bërë masakra”, thotë Parashumti, për Klan Kosova.
“Një djalë ka mbet gjallë. E kam parë në Shqipëri, quhet Dren Caka”.
“Çka më ka treguar ai mua, ai është munduar ta shpëtoj motrën e tij, atë natë kishte ajo ditëlindjen. U mundua ta largojë nga dritarja e banjos, nuk ka mundur pasi nuk kishte forcë nga dora e plagosur, kur ka filluar zjarri ai është larguar nga dritarja e ka dalë ë oborr. Motra e tij. Nënë dhe të gjithë të vdekurit i ka zënë zjarri”.
Në këtë masakër u vranë mbi 70 civilë në atë lagje.
