Ministri i Punës dhe Mirëqenies Sociale, Skender Reçica ka njoftuar qytetarët të cilët kanë punuar në shtetin e Zvicrës se nga data 1 Shtator 2019, mund të fillojnë t’i paraqesin kërkesat për përfitim të pensioneve dhe beneficioneve, në bazë të Marrëveshjes për Sigurime Sociale mes Kosovës dhe Zvicrës, e nënshkruar vitin e kaluar.
Reçica në një postim në llogarinë e tij në Facebook ka shkruar se kjo marrëveshje, të cilën e kanë nënshkruar vitin e kaluar hyn në fuqi nga 1 Shtatori, duke i dhënë mundësinë qytetarëve që të gëzojnë një të drejtë e cila u ishte mohuar për një kohë të gjatë.
Postimi i plotë i Ministrit Reçica:
Një lajm i mirë për qytetarët e Republikës së Kosovës!
Qytetarë të dashur, ju pensionistë të nderuar,
Të gjithë ju që keni kontribuar në shtetin e Zvicrës tashmëmund të filloni ti paraqisni kërkesat për përfitim të pensioneve dhe beneficioneve në bazë të marrëveshjes për Sigurime Sociale mes dy shteteve tona.
Kjo marrëveshje, të cilën e nënshkruam vitin e kaluar hyn në fuqi nga 1 Shtatori, duke i dhënë mundësinë qytetarëve që të gëzojnë një të drejtë e cila u ishte mohuar për një kohë të gjatë.
Urime për të gjithë qytetarët e Kosovës që kanë derdhur djersën dhe kontribuar për familjet e tyre për aq vite. Falënderoj shtetin e Zvicrës për gatishmërinë për ti dhënë zgjidhje çështjes së sigurimeve sociale mes dy shteteve tona.
Informatat rreth procedurave të aplikimit mund ti gjeni në linkun e më poshtëm.
Marrëveshja për Sigurime Sociale me Zvicrën hyn në fuqi nga 1 Shtatori 2019