Autori i serisë së dokumentareve ”Gjurmë shqiptare” dhe “Shqipëria tjetër” në Top Channel, Marin Mema ka ardhur më një rrëfim në emisionin “Personale” me Krenare Vokshi-Shala në RTV Dukagjini.
Mema, i cili është fitues i shumë çmimeve për punën e tij, ka thënë se historia e shqiptarëve është fshehur dhe sipas tij është detyrë e shqiptarëve të promovojnë historinë e tyre.
“Shqiptarët kanë një histori të jashtëzakonshme që edhe vet nuk dimë ta vlerësojmë”, tha ai, përcjell Telegrafi.
Gazetari ka thënë se për promovimin e historisë sonë qeveritë në Shqipëri dhe Kosovë nuk kanë bërë sa duhet.
“Mbështetje tipike nuk kam pasur as nga akademitë e as bie fjala Ministria e Kulturës. Gjithçka kam bërë vet dhe madje jam përpjekur vet të qëndrojë larg institucioneve që lidhen me politike”.
Mema thotë se në bazë të kërkimeve kohëve të fundit në Shqipërinë e Veriut janë zbuluar disa dhjetëra “tuma” e që sipas tij këto kanë logjikën e njëjtë me ndërtimin e piramidave të Egjiptit.
“Gjurmimet duhet të shtrihen edhe në Kosovë pasi në bazë të burimeve tona me qindra varreza të tilla ka edhe aty”.
Gazetari hulumtues ka thënë se historinë duhet ta shkruajnë historianët e arkeologët ndërsa sipas tij aty ku përzihen politikanët aty ka deformime.
“Ka shumë historianë që kanë dëshira dhe interesa tjera. Në jo pak raste fqinjët kanë hedhur para për të blerë qëndrimet e historianëve dhe kjo është e pafalshme”.
Duke folur për raportet me Greqinë, historiani ka thënë se fshatra dhe krahina të tëra me shqiptarë janë asimiluar atje.
Ai thotë se është shumë e vështirë të vizitosh Prevezën-vendbanim në Çamëri, dhe të bësh ndonjë filmim edhe nëse nuk je gazetar pasi sipas tij ka presion të madh nga shteti grek.
Mema thotë se lagjja më e vjetër në Athinë e ka emrin Plaka. Ai thotë se shumë toponime janë ndryshuar ndërsa sipas tij pak kanë mbetur shqiptare.
Gazetari shton më tej se nga 100 heronjtë e revolucionit grek të vitit 1921, 90 prej tyre janë shqiptarë./Telegrafi/