Ne duhet të presim ngjarje të rëndësishme zgjerimi në muajt e ardhshëm. Në fillim të qershorit, Komisioni Evropian do të shpallë propozim-kornizën e negociatave për fillimin e negociatave me vendin tonë, si dhe raportin e rregullt vjetor që komenton përparimin e Maqedonisë së Veriut në të gjitha segmentet, tha në një intervistë për AIM-në Bojan Mariçiq, koordinator kombëtar për integrim në BE dhe negociatori kryesor për çështje teknike.
Sipas tij, është reale të pritet që gjatë presidencës gjermane me BE-në, në vjeshtë ose në fund të këtij viti të mbahet konferenca e parë ndërqeveritare me një kornizë të miratuar negociuese. Kjo, siç thotë Mariçiq, do të shënonte fillimin zyrtar të negociatave tona për anëtarësim, përcjell Telegrafi Maqedoni.
Lidhur me kërkesat e palës bullgare për gjuhën maqedonase dhe pakicën, Mariçiq tha se Marrëveshja e Miqësisë dhe Fqinjësisë së mirë me Bullgarinë siguron një kornizë për zgjidhjen e mosmarrëveshjeve pa bllokada dhe konflikte.
“Ne dëshirojmë të bashkohemi në Bashkimin Evropian si maqedonas që flasin gjuhën maqedonase, duke qenë miqësorë me të gjithë fqinjët tanë. Ky qëllim është i arritshëm nëse i qasemi procesit në mënyrë të arsyeshme dhe të sigurt. Prandaj, nuk pres veto, por pres bashkëpunim intensiv në interes të përbashkët të Maqedonisë së Veriut dhe Bullgarisë si fqinjë të afërt”, tha Mariçiq./Telegrafi/