Shefja e Grupit Parlamentar të LVV-së, Mimoza Kusari-Lila ka reaguar sa i përket përfaqësimit të Kosovës në “Tirana Marathon” që u mbajt dje në Tiranë.
Përmes një reagimi në Facebook, Kusari-Lila ka thënë se vrapuesve nga Kosova nuk i është njohur përkatësia shtetërore.
“Por, përderisa të gjithë pjesëmarrësve nga vendet tjera, ju njihej përkatësia shtetërore dhe shënohej flamuri shtetëror në rezultatet e garës, fatkeqësisht kjo nuk ishte rasti me vrapuesit nga Kosova”, ka shkruar ajo.
Deputetja ka theksuar se pjesëmarrësit nga Kosova janë përfaqësuar me shenjën XK dhe jo KOS, siç është shkurtesa zyrtare dhe pranë shkurtesës nuk ka qenë flamuri i Kosovës.
“Të gjithë pjesëmarrësit nga Republika e Kosovës në Maratonën e Tiranës ishin përfaqësues me shenjën XK (dhe jo KOS, sipas shkurtesës zyrtare të Kosovës) dhe pranë kësaj shkurtese nuk ishte flamuri ynë. Do të thotë, rezultati final i garës nuk mban as emrin dhe as flamurin e Kosovës, përkundër faktit që vit pas viti, numri i shtetasve të Kosovës është në rritje në vrapimin e Tiranës”, u shpreh Kusari-Lila.
Kusari-Lila ka shtuar se të njëjtin rast e kemi hasur më herët në Maqedoninë e Veriut, por gabimi ishte korrigjuar dy vite më parë, pas reagimit të vrapuesve nga Kosova.
“Se do vinte dita të mos njihej shkurtesa zyrtare dhe shënohej flamuri i Kosovës në Shqipëri, nuk do e mendoja. Duke qenë e vetëdijshme se gabimi përtej teknik, nuk ka asnjë prapavijë tjetër, lus organizatorët të ngrisin këtë çështje me kompaninë greke që administroi numrat e garës, dhe asnjëherë tjetër të mos përsëritet ky gabim”, ka shkruar ajo, duke shtuar se “Shqipëria nuk do të duhej të ishte fare në listën e shteteve që cenon përfaqësimin shtetëror të garuesve nga Kosova”. /Telegrafi/
