Në Indeksin e publikuar të lirisë së mediave në mbarë botën, Reporterët pa Kufij, Maqedonia është renditur e 118, një vend më poshtë nga viti i kaluar, transmeton Telegrafi Maqedoni.
Në arsyetim theksohet edhe pse shpifja është hequr nga Kodi Penal në vitin 2012, akuzat u zëvendësuan me aksione civile, me mundësinë e gjobave të rënda dhe dënimet me burg për gazetarët dhe pronarët e mediave.
Që nga fundi i vitit 2014 janë paraqitur të paktën 580 padi për shpifje, dhe dhjetë raste prej tyre kundër gazetarëve. Si rezultat, sipas një ankete të sindikatës maqedone të gazetarëve dhe punonjësve të medias, më shumë se gjysma e gazetarëve në Maqedoni thonë se ata vet cenzurohen.
Në pjesën e lartë të raportit në të cilën rangohen 180 vende janë: Holanda, Finlanda, Norvegjia, Danimarka dhe Zelanda e Re, ndërsa në pjesën e poshtme të raportit janë: Kina, Siria, Turkmenistani, Koreja e Veriut dhe Eritrea.
Polonia ka rënë për 29 vende për shkak të një ligji të ri, të miratuar nga janari, i cili i jep një mundësi qeverisë konservatore që të kontrollojë mediat shtetërore. /Telegrafi/