Maqedonia konsiderohet si një ndër vendet me rroga më të ulëta nga vendet e ish-republikave jugosllave. Kjo është theksuar në Konferencën Ndërkombëtare të drejtorëve të Enteve për punësim të Maqedonisë, Serbisë, Malit të Zi, Kroacisë, Sllovenisë dhe Bosnjë-Hercegovinës.
Në këtë konferencë të mbajtur në Herceg Novi nuk ishte ftuar Kosova, si një shtet i ri, ku rroga mesatare gjithashtu është rreth 200 euro. Përveç kësaj edhe Shqipëria është vendi i cili ka shënuar përparime në planin e rritjes së rrogës mesatare, me ç`rast sipas dhjetorit të vitit 2008, rroga mesatare në këtë vend kishte arritur rreth 300 euro.
Nga të gjitha ish-republikat jugosllave rroga më e ulët mesatare regjistrohet në Maqedoni, por gjithashtu ky vend është ndër vendet kryesore të rajonit për numrin e madh të papunëve.
Drejtoresha e Agjencisë për punësim, Biljana Jovanovska përveç kësaj gjendje ka theksuar masat e Qeverisë për nxitjen e punësimeve dhe zbutjen e pasojave nga kriza ekonomike. Maqedonia përballet me një numër të madh të papunëve, që arrin mbi 300 mijë veta.
Përveç Maqedonisë, edhe Bosnjë-Hercegovina është vendi i parë për nga papunësia në rajon, me ç`rast në këtë vend janë të regjistruar mbi 450 mijë të papunë. Të dhënat e publikuara në konferencën e vendeve të republikave ish-jugosllave, Mali i Zi ka vetëm 10 për qind të papunëve.