Zëvendës kryeministri i Republikës së Maqedonisë, i angazhuar për çështje evropiane, Bujar Osmani sot morri pjesë në Konferencën e 13-të të qyteteve dhe rajoneve evropiane me temë “Gjenerata e ardhshme e shteteve anëtare të reja të BE”, në organizim të Institutit të rajoneve të Evropës në Slazburg, Austri.
Në fillim të konferencës, zv.kryeministri Osmani, së bashku me ministrat tjerë të rajonit kanë realizuar takim joformal me komisarin evropian për zgjerim, Johannes Hahn.
Siç informojnë nga kabineti i tij, Osmani në takim e ka informuar komisarin Hahn për përparimet e vendit në zhbllokimin e proceseve të integrimit, zbatimin e Planit 3-6-9 dhe zhvillimet në lidhje me shtetet fqinje.
“Pikë qendrore për shumicën e re politike dhe njëkohësisht edhe për Qeverinë e re të Maqedonisë janë reformat dhe përkushtimi ndaj integrimeve evropiane”, ka thënë Osmani në fjalimin e tij në konferencë.
Ai ka thënë se në 100 ditët e para të Qeverisë, prioritet kryesor i ka qenë anëtarësimi në BE, për çka është përpiluar edhe Plani 3-6-9 në të cilin janë të përfshira të gjitha masat dhe aktivitetet të cilat Qeveria detyrohet t’i zbatojë në afat prej tre, gjashtë dhe nëntë muaj dhe zbatimi i tyre lëviz me dinamikën e planifikuar.
Në pjesën për marrëdhëniet e përmirësuara me shtetet fqinje, Osmani tha se me Bullgarinë është nënshkruar Marrëveshje për fqinjësi të mirë, që sipas tij është marrëveshje historike, pa shtypje dhe pa përfshirjen e ndërmjetësuesve nga bashkësia ndërkombëtare./Telegrafi/