Dy personat të cilët u fotografuan në uniforma policore janë zyrtarë policorë, ndërsa personi i tretë është nga Prilepi dhe ndaj tij është dorëzuar akuzë për kundërvajtje, për shkak se rrejshëm është paraqitur si polic në rrjetet sociale.
Pas publikimit të fotografive të tyre dhe reagimit në opinion, ka reaguar edhe MPB – të cilët e dënuan sjelljen e tyre, duke e vlerësuar si jopërgjegjëse, përcjell Telegrafi Maqedoni.
“Gjatë kontrolleve u konstatua se dy personat që janë fotografuar së bashku në makinë janë zyrtarë policorë dhe janë fotografuar në makinën e autorizuar të policisë, dhe ata u thirrën menjëherë në një kontroll të brendshëm në Ministrinë e Brendshme, me ç’rast ndaj tyre filloi një procedurë urgjente disiplinore, ndërsa për epilogin do ta informojmë opinionin në kohë”, thonë nga MPB.
Ata shtojnë se ndaj 27-vjeçarit nga Prilepi do të dorëzojnë akuzë për kundërvajtje, për shkak të paraqitjes së rrejshme si polic në rrjetet sociale.
MPB apelon tek policët të jenë të kujdesshëm me përmbajtjet që i publikojnë në rrjetet sociale.
Ndryshe, personat ndaj të cilëve tashmë ka reaguar MPB, mbrëmë gjatë orës policore publikuan disa fotografi me përmbajtje frikësuese për qytetarët./Telegrafi/