Të gjithë bujqit të cilët dëshirojnë t’i modernizojnë fermat prej sot e deri më 14 prill 2020, do të mund të aplikojnë për marrjen e mbështetjes financiare përmes Programit IPARD 2.
Bëhet fjalë, siç kumtojnë nga Agjencia për mbështetje financiare në bujqësi dhe zhvillimin rural, për masën “Investime në mjete materiale të ekonomive bujqësore” nga Programi IPARD 2. Mbështetja e përgjithshme financiare në kuadër të kësaj thirrje publike është 9.216.693 euro apo 568.147.394 denarë.
Kjo thirrje, sqarojnë nga Agjencia, u mundëson ekonomive bujqësore spektër gjerë të investimeve në bujqësinë primare dhe prodhimin ekonomik, përfshirë edhe ndërhyrjet infrastrukturore.
Mjetet financiare me kërkesa të mëvetësishme ndahen si grant i pakthyeshëm në shumë prej 60 për qind të vlerës së shpenzimeve të pranueshme të investimeve për këtë masë. Përqindja rritet deri në 65 për qind për investime në ekonomitë bujqësore të propozuar nga bujqit e rinj (persona fizikë të moshës prej 18 vjeç deri në 40 vjeç në ditën e shtrimit të kërkesës për mbështetje financiare) dhe 70 për qind investime në ekonomitë bujqësore në zonat malore.