“Mbi 400 kompani që kanë investuar ose do të investojnë në rritjen e konkurrencës gjatë periudhës Covid dhe post-Covid do të marrin mbështetje financiare nga shteti”, deklaroi Ministri i Ekonomisë, Kreshnik Bekteshi.
Për mbështetjen e biznesit përmes kësaj mase, e cila ishte pjesë e Pakos së tretë të masave të Qeverisë, siç tha ministri, do të ndahen nga 17 në 18 milionë euro në varësi të ciklit të investimeve të kompanive.
“Sot e pata mundësinë ta marr edhe raportin nga Komisioni i cili ka punuar në Thirrjen Publike për mbështetje financiare të konkurrencës së kompanive gjatë periudhës Kovid dhe post-Kovid dhe dua të informoj se do të mbështeten mbi 400 kompani që investojnë ose do të investojnë gjatë vitit 2021, që do të thotë krijimin e vendeve të reja të punës. Duhet të merret vendim mbi këtë masë, që do të thotë se 17 deri në 18 milionë euro do t’u shpërndahen kompanive për ciklin e tyre të investimeve”, tha Bekteshi në emisionin Top tema në TV Tellma.