Shërbimet në Ministrinë për Punë dhe Politikë Sociale, faqja e të cilës është vetëm në gjuhën maqedonase, thonë se materialet përkthehen edhe në gjuhën shqipe, por të njëjta vendosen brenda të njëjtit link ku është lajmi në gjuhën maqedonase. Në fakt, të përkthyera janë vetëm disa ngjarje ditore dhe të gjitha materialet tjera janë në gjuhën maqedonase. Nga ky dikaster insistojnë se faqja është në formën e duhur, pa dhënë përgjigje se përse tek e njëjta nuk shtohet mundësia për kalimin gjuhën angleze dhe atë shqipe, pasi për zbatimin e gjuhës shqipe është lëshuar kërkesë nga qeveria deri tek të gjitha institucionet.
Një tjetër faqe, ku gjuha shqipe nuk figuron është ajo e Ministrisë së Punëve të Jashtme. Megjithatë nga kjo ministri thonë se ligji për gjuhët do të zbatohet, por pasi të krijohet faqja e re, sepse ajo aktuale nuk ofron mundësi për shtimin në sistem edhe të një gjuhe.
Disa nga Ministritë faqet e të cilave figurojnë në tre gjuhë, dhe të cilat edhe pas kalimit në gjuhën shqipe apo angleze, materialet në nënkategori mbeten në gjuhën maqedonase, arsyetohen me mungesën e përkthyesve.
Zëdhënësi i Qeverisë, Muhamet Hoxha, thotë se të gjitha Institucionet, pa asnjë arsyetim, obligohen të respektojnë ligjin.
“Së shpejti Grupi ndër resorësh i formuar nga sekretarët shtetëror të institucioneve, të ministrive përkatëse, do të kërkojë edhe raport nga institucionet që ka të bëjë me të gjitha obligimet, të gjitha konkluzat që I janë ndërmarrë nga ky grup, që ka të bëjë me Marrëveshjen e Prespës dhe Ligjin e Gjuhëve. Konkluza vlen për të gjitha institucionet, se pas hyrjes në fuqi të ligjit, të gjitha duhet të zbatojnë përdorimin e gjuhës shqipe”, tha Muhamed Hoxha, zëdhënës i Qeverisë.
Hoxha thotë se përkthimi i të gjitha materialeve të faqeve zyrtare, përfshirë këtu edhe faqen e Qeverisë, do të jetë pak i vështirë, pa formimin e Inspektoratit për zbatimin e Ligjit për përdorimin e gjuhëve dhe pa kompletimin e Agjencisë.
Probleme me përditësimin e të dhënave ka edhe në faqet e ministrive të cilat drejtohen nga kuadrot shqiptar, por nuk morëm përgjigje nga asnjë prej këtyre dikastereve. Ministria për shoqëri Informatikë dhe administratë do të formojë grup pune i cili duhet të merret me unifikimin e të gjitha faqeve të ministrive, me çka me automatizëm do të fillojë zbatimi i shqipes edhe në ato faqe ku aktualisht nuk figuron. Institucionet duhet që 6 muaj pas hyrjes në fuqi të Ligjit të gjuhëve, të zbatojnë të njëjtin, në të kundërt parashihen gjoba prej 4 000 deri 5 000 euro për institucionin dhe 30% e kësaj shumë për drejtuesin e të njëjtit./Alsat/