Në një takim të zhvilluar paraditen e sotme për ndihmën juridike ndaj qytetarëve, ministri Manjani tha se një sipërmarrje e tillë do të nisë me projektin e klinikës ligjore në mënyrë zyrtare e shtetërore. Ai foli edhe për hartimin e një projekt ligji për këtë pasi tani është vendosur një standard të ri.
Manjani pohoi se skema e sotme e ndihmës juridike falas është në kolaps dhe duhet bërë reformim në rrënjë.
“Skema e ndihmës ligjore falas është ende në kolaps. Nuk kemi gjetur ende mekanizmin e duhur për ta bërë funksionale. Duhet ta reformojmë skemën aktuale deri në rrënjë. Së shpejti në Ministrinë e Drejtësisë do të ngremë zyrën e informacionit ligjor ku do të ketë klinikë ligjore. Do ta nisim këtë projekt në mënyrë zyrtare dhe ligjore por nuk mund të zëvendësojmë gjykatat. Së shpejti të kemi një projekt ligj të ri me skemë të re me një model të ri të një vendi anëtar të BE-së që të garantojmë këtë . Është çështje standardi dhe jo na pëlqen apo s’na pëlqen, duhet ta bëjmë”, tha ministri Manjani. /Telegrafi/