Paul Pogba gjatë ditëve të fundit është raportuar se do të ndryshojë mjedis.
Mesfushori francez, Pogba thuhej se do të largohet prej Manchester Unitedit gjatë afatit kalimtar të verës.
Madje, Mino Raiola kishte udhëtuar drejt qytetit anglez të Mançesterit për të diskutuar largimin e klientit të vetë.
Megjithatë, Djajtë e Kuq nuk dëshirojnë të humbin shërbimet e shtatgjatit dhe nuk dëshirojnë ta shesin lojtarin, i cili gjatë muajve të fundit kishte probleme me trajnerin, Jose Mourinho.
Ditëve të fundit u raportua se Pogba do të transferohet te Barcelona apo do të rikthehet te skuadra ku dy vjet më parë u transferua në Old Trafford – Juventus.
“Goal” raporton se Unitedi nuk e ka konsideruar kurrë largimin e Pogbas këtë afat kalimtar.
Ndryshe, Pogba tashmë i është bashkangjitur skuadrës në stërvitjet dhe do të jetë pjesë e ekipit në ndeshjen e parë kampionale gjatë ditës së premte (10 gusht) kundër Leicester Cityt. /Telegrafi/