Trajneri i Man United, Erik Ten Hag nuk do të jetë në gjendje ta udhëheq nga stoli ekipin e tij, kur ata do të përballen me Evertonin në udhëtim pas pushimit me kombëtare.
Kjo për shkak se holandezi u ndëshkua me karton të verdhë në ndeshjen ndaj Luton Town të cilën “Djajtë e Kuq” e fituan me rezultat minimal 1-0 falë golit të Lindelof, pas një proteste tek gjqytari kryesor i takimit.
Ky ishte njëherësh kartoni i tretë i verdhë për Ten Hag, që do të thotë se ai automatikisht do të dënohet më një ndeshje dhe kështu do të duhet të ndjekë nga tribuna sfidën ndaj Evertonit.
Ten Hag ishte ndëshkuar me karton të verdhë më herët gjatë këtij sezoni ndaj Tottenhamit dhe Arsenalit.
Pas ndeshjes, ai pranoi se kishte gabuar kur vendosi të kundërshtonte gjyqtarin.
“Ka një pikë të caktuar që duhet të pranosh vendimet e gjyqtarit, këtë duhet të bëj edhe unë,” ka thënë ai.
Në fund Ten Hag shtoi se ka besim tek asistentët e tij për të menaxhuar mungesën e tij në ndeshjen që do të zhvillohet në “Goodison Park”.
“Ne kemi një staf stërvitor shumë kompetent dhe ata do ta marrin përsipër këtë detyrë”, përfundoi 53-vjeçari./Telegrafi/