Man City fiton Superkupën e Anglisë pas triumfit në penallti ndaj Liverpoolit, Shaqiri ishte i saktë nga pika e bardhë

Manchester City ka arritur të fitojë (5-4) në penallti ndaj Liverpoolit në finalen e Superkupës së Anglisë të njohur ndryshe si FA Community Shield pasi koha e rregullt përfundoi 1-1.

Finalja e madhe e Superkupës së Anglisë e zhvilluar në Wembley ka dhuruar aksion, emocione dhe gola, ndërsa në fund fitores iu gëzua ekipi i Pep Guardiolas.

Lexo po ashtu Zbatohen rregullat e reja në Superkupën e Anglisë, Guardiola bëhet trajneri i parë që ndëshkohet me kartonë të verdhë

Pjesa e parë e ndeshjes u karakterizua me lojë më të mirë dhe raste më të shumta nga ana e Cityt, të cilët edhe gjetën golin.

Goli i vetëm në këtë pjesë erdhi në minutën e 12-të dhe ishte Raheem Sterling, i cili shënoi nga afërsia për 1-0 pas një skemë të mirë të Cityt.

Në pjesën e dytë, u zhvillua krejtësisht lojë tjetër dhe djelmoshat e Jurgen Kloppit treguan tjetër fytyrë duke dominuar me raste dhe duke gjetur golin e barazimit.

Fillimisht Reds patën rast të mirë në minutën e 57-të, por goditja e Virgil Van Dijk u ndal nga shtylla.

Megjithatë, në minutën e 77-të Liverpooli gjeti golin dhe ishte Van Dijk ai i cili asistoi për partnerin e tij Joel Matip që shënoi nga afërsia për 1-1.

Deri në fund të ndeshjes, Liverpooli pati edhe disa raste të mira shënimi me anë të Naby Keita (83′), Mohamed Salah (88′, 90+) dhe Xherdan Shaqiri (90+), por pa sukses dhe në fund fituesi u desh të përcaktohej nga penalltitë.

Në ekzekutimin e penalltive më të saktë ishin lojtarët e Cityt, të cilët fituan në fund me rezultat 5-4.

Te Liverpooli, ylli shqiptar Shaqiri e shënoi golin e parë. /Telegrafi/ 

https://twitter.com/TheGoalsBible/status/1158041440150335489