Brandon Lee ishte një aktor amerikan dhe artist marcial. Ai ishte djali i ikonës së filmave të arteve luftarake, Bruce Lee. Babai i tij ndërroi jetë në moshë 32-vjeçare (në vitin 1973), ndërsa Brandon humbi jetën tragjikisht si 28 vjeçar (në vitin 1993).
Misteri i vdekjes së Bruce që është shoqëruar me një numër të madh të teorive duke përfshirë edhe ato konspirative, dhe vdekja e Brandon në rrethana të papritura gjatë xhirimit të filmit “The Crow”, kanë krijuar teorinë e quajtur “Mallkimi i Lee-ve”.
Kur një ikonë vdes para kohë, është normale që krijohen teori konspirative. Duke nisur nga Marilyn Monroe, presidenti amerikan John F. Kennedy e deri te reperi Tupac Shakur – janë thënë mijëra versione rreth vdekjeve të tyre.
Megjithatë, nuk ka dyshim se ekzistojnë disa koincidenca rreth yllit me origjinë nga Hong Kongu, Bruce Lee, duke përfshirë edhe krahasimet me vdekjen e djalit të tij dhe rrethanat para vdekjes së tyre.
Telegrafi jua sjell tri fakte që ndërlidhen me vdekjet e tyre:
Filmi biografik për Bruce Lee parashikoi vdekjen e djalit të tij
Në vitin 1993 u shfaq filmi për jetën e Bruce Lee, “Dragon: The Bruce Lee Story”, në të cilin ai lufton me një demon metaforik, i cili e ndiqte që nga lindja. Në fund të filmit, demoni humb interesimin për Bruce dhe drejtohet kah djali i tij, Brandon. Dy muaj para lansimit të filmit, Brandon vdiq tragjikisht.
Pasi humbën një djalë, prindërit besonin se dikush dëshironte vdekjen e Lee
Bruce Lee lindi në San Francisco në Vitin e dragoit, në Orën e dragoit, mirëpo prindërit e tij gjithmonë i referoheshin si ‘Feniksi i vogël’ që është emër vajze në Kinë. Kjo për faktin se para se të lindte Bruce, ata kishin humbur një djalë tjetër dhe sipas traditës, nuk duhej t’i referoheshin me emër mashkullor, në mënyrë që të krijonin konfuzitet te fantazmat që përpiqen t’ua vjedhin shpirtrat fëmijëve.
Në filmin e fundit të Bruce Lee, karakteri i tij vritet në aksident në xhirimet e filmit – njësoj si djali i tij
Para se të vdiste, Bruce ishte duke xhiruar filmin “Game of Death”, i cili flet për një kampion të pensionuar të arteve marciale, i cili duhej të ngjitej në maje të një faltoreje për të shpëtuar vëllanë dhe motrën e tij. Pas vdekjes së Lee, skenari ndryshoi dhe kishte protagonist një aktor të filmave luftarakë, të cilin e gjuajnë me armë në xhirime. Në vitin 1993, 15 vjet pasi u lansua filmi “Game of Death”, djali i Lee, Brandon, u vra aksidentalisht në xhirimet e filmit “The Crow”. /Telegrafi/