Esat Mala ka kaluar në afatin kalimtar të janarit në skuadrën shqiptare të Partizanit.
Fillimisht nisi të luajë si zëvendësues ndërsa tani është bërë lojtar i rregullt i mesfushës së ekipit.
Në një bisedë për Telegrafin lojtari ka pohuar se është i kënaqur me paraqitjet e gjertanishme dhe se ka mbështetjen e trajnerëve.
“Jam i kënaqur me mundësinë që më është dhënë. Shpresoj se jam duke e arsyetuar minutazhen që po ma jep trajneri”, tha Mala.
Ai më tutje tregoi objektivat e ekipit që është dalja në garat evropiane.
Futbollisti 19-vjeçar po shpreson se me paraqitjet e mira dhe angazhim maksimal, do të ftohet në kombëtaren e grupmoshave të reja.
“Shpresoj se do të ftohem në ekipin kombëtar e të rinjve. Jam duke u angazhuar që të kem paraqitje sa më të mira”, tha Mala.
Theksojmë se deri më tani në gjashtë paraqitje në kampionatin shqiptar, Mala ka pasur një asistim.
Ndryshe, Partizani zë pozitën e pestë të renditjes tabelore të ligës elitare shqiptare ne 32 pikë. /Telegrafi/