Forcat e sigurisë së Venezuelës arrestuan dhjetëra njerëz, përfshirë dy amerikanë, pas një aksioni që dyshohet se kishin për qëllim rrëzimin e presidentit Nicolas Maduro – një komplot që thuhet se përfshin udhëheqësin e opozitës të mbështetur nga SHBA, Juan Guaido.
Megjithatë, sipas Al Jazeera, përcjell Telegrafi, presidenti amerikan Donald Trump të martën tha se situata e Venezuelës “nuk ka asnjë lidhje me qeverinë tonë”.
“Ne do ta zbulojmë. Ne vetëm kemi dëgjuar për të”, tha Trump kur u pyet për incidentin dhe arrestimin e amerikanëve.
Ndërkohë thuhet se Maduro mbajti dy pasaporta blu amerikane, duke lexuar emrat dhe datat e lindjes në to në një transmetim mbarëkombëtar në televizionin shtetëror të hënën.
“Qeveria e Shteteve të Bashkuara është e përfshirë plotësisht në këtë sulm të mposhtur”, tha Maduro. /Telegrafi/