Romelu Lukaku më në fund është bërë me skuadër të re pas shumë spekulimeve gjatë afatit kalimtar veror.
Sulmuesi belg është bashkuar me gjigantin italian Romës si huazim një vjeçar nga skuadra angleze Chelsea.
Pritja për Lukakun ka qenë madhështore nga tifozët verdhekuq të cilëve në skuadër iu erdhi një top sulmues si belgu që ka lënë gjurmë në të gjitha klubet ku ka luajtur.
Belgu është shprehur shumë i lumtur dhe mirënjohës për pritjen që i është bërë nga tifozët e Romës.
“Pritja që më rezervoi klubi dhe tifozët më ka emocionuar dhe është një stimul më shumë që të jap gjithçka për skuadrën time të re. Kam ndier atmosferën e stadiumit Olimpico si kundërshtar, kam ndier nxehtësinë e tifozerisë romaniste dhe tani është e bukur të jem edhe unë pjesë e kësaj”.
“Kam pasur mundësinë të flas me pronarët e klubit në ditët e kaluar dhe kam mbetur i impresionuar nga ambiciet e tyre, ndaj tani duhet të punojmë dhe të rritemi ndeshje pas ndeshjeje”.
“Nga ana ime me zor pres të vihem në dispozicion të shokëve, brenda dhe jashtë fushe”, deklaroi sulmuesi belg.
Kësisoj Lukaku bashkohet me trajnerin portugez Jose Mourinho me të cilin kishte punuar më parë edhe te Chelsea dhe Manchester United. /Telegrafi/