Deri më tani Shtetet e Bashkuara të Amerikës kanë refuzuar disa oferta fillestare nga Kina në fillimin e vitit 2018 për të rritur blerjet e mallrave në vend, duke zgjedhur në vend të kësaj të vazhdonte me tarifat.
Në takimin e G20 që u mbajt në Buenos Aires të Argjentinës në muajin dhjetor 2018, presidenti Donald Trump dhe Xi Jiping u pajtuan të negociojnë mbi çështjet strukturore, duke përfshirë “transferimin e detyruar të teknologjisë, mbrojtjen e pronësisë intelektuale, barrierat jotarifore, ndërhyrjet kibernetike dhe vjedhjen kibernetike, shërbimet dhe bujqësinë”. Mirëpo, ka pasur shumë pak përparim në këto çështje në një raund bisedimesh midis zyrtarëve të nivelit të mesëm.
Në vend të kësaj, zyrtarët kinezë ofruan të rrisnin ndjeshëm blerjet e produkteve amerikane në një përpjekje për të eliminuar deficitin tregtar të SHBA-së me Kinën për një periudhë disa vjetore, përcjell Telegrafi.
A do të pranojnë zyrtarët amerikanë një marrëveshje që bazohet kryesisht në blerje? Trump ka qenë optimist për një marrëveshje, duke thënë se një dobësim i ekonomisë kineze i jep Pekinit nxitje për të negociuar. Por këshilltarët e Trrumpit thonë se ai nuk do t’i zbusë kërkesat e tij që Kina të bëjë reforma strukturore.
Disa zyrtarë të Administratës Trump, përfshirë Wilbur Ross, janë përpjekur të ngrenë pritjet për takimet e kësaj jave, duke thënë se të dy vendet “janë milje dhe milje” nga zgjidhja e dallimeve të tyre tregtare. Një kërkesë kryesore e SHBA është krijimi i një mekanizmi për rishikimet e rregullta të përparimit të Kinës në ndjekjen e çdo premtimi të reformës që ajo bën, një plan që do të mbajë një kërcënim të vazhdueshëm të tarifave të SHBA.
Por, cilat janë rezultatet e mundshme të bisedimeve të kësaj jave? Të dy palët mund të raportojnë disa përparime drejt një marrëveshje, ndonëse një bllokim tjetër mbi çështjet strukturore thelbësore do të shihej si një shenjë negative për një marrëveshje deri në mars dhe investitorët do të mbështeteshin për tarifa më të larta. Por negociatat tregtare shpesh komplikohen, kështu që një përfundim përfundimtar nuk ka gjasa para fundit të shkurtit dhe çdo marrëveshje do të ketë nevojë për miratimin e Trump dhe Xi.
Nëse bëhen përparime të mjaftueshme, të dy palët gjithashtu mund të vendosin të zgjasin afatin dhe të vazhdojnë negociatat, siç ndodhi shpesh gjatë bisedimeve vitin e kaluar për të zëvendësuar Marrëveshjen e Tregtisë së Lirë të Amerikës së Veriut (NAFTA). /Telegrafi/