Nga partia në pushtet LSDM, thonë se dje lideri i OBRM-PDUKM-së, Hristijan Mickoski ka përjetuar një debakël të ri në Kuvend, ku vetëm 20 deputetë e kanë mbështetur interpelancën për Spasovski.
“Po bëhet gjithnjë më e qartë që Hristijan Mickoski nuk ka mbështetjen e grupit të vetë që përfaqëson, nga ajo që ka ngelur në OBRM-PDUKM”, thuhet në deklaratën e LSDM-së.
Anga atje thonë se kjo konfirmoi se interpelanca kundër Oliver Spasovskit ka qenë e pabazë.
“Kuvendi i Republikës së Maqedonisë së Veriut ka humbur edhe një ditë për shkak të Hristijan Mickoskit, në vend që deputetët të fokusohen në reformat ligjore, në vendimet ligjore të cilat sjellin përfitime për qytetarët”, thonë nga LSDM.
Dje me 59 vota “kundër”, 20 “për” dhe 10 të përmbajtur, Kuvendi nuk kaloi interpelancën për ministrin për Punë të Brendshme, Oliver Spasovski. Interpelanca ishte ngritur nga OBRM-PDUKM./Telegrafi/