Kryetari i LSDM-së, Zoran Zaev i anuloi të gjitha aktivitetet për ditët e ardhshme. Gjithashtu janë anuluar të gjitha aktivitetet që ishin në agjendë partiake me qëllim që të parandalohet përhapja e coronavirusit.
“Edhe pse ishin caktuar takime me kryetarin Zoran Zaev me disa oda ekonomike, dhe nesër dhe pasnesër ishin paraparë disa aktivitete partiake, udhëheqësia e LSDM-së vendosi që të anulohen aktivitetet për shkak se s’ka vlerë më të madhe se sa shëndeti”, tha sekretari i Përgjithshëm i LSDM-së, Ljupçe Nikolloski, përcjell Telegrafi Maqedoni.
Në lidhje me kongresin e djeshëm të LSDM-së në një hotel nv Shkup, ku të pranishëm ishin qindra delegatë, mysafirë dhe gazetarë, Nikollovski vërtetoi se anëtarët e partisë më herët kishin nënshkruar deklarata se nuk kanë udhëtuar në rajonet e rrezikshme dhe shtetet që janë të rrezikshme nga infeksioni.
“Gjatë kongresit u respektuan të gjitha rekomandimet. Delegatët para se të hynë në kongres nënshkruan deklarata se nuk kanë qenë në rajonin ku ka përfshirë coronavirusi”, tha mes tjerash Nikollovski./Telegrafi/