Pavarësisht paraqitjeve të dobëta në Ligën e Kombeve, duke zbritur në Ligën B pas humbjes në “San Siro” ndaj Italisë, Lothar Matthaus është i bindur se, të paktën për sa iu përket emrave, Anglia është ende një nga kandidatët kryesorë për të fituar Kupën e Botës, e cila do të fillojë në mesin e nëntorit në Katar.
E fundit me vetëm dy pikë në Grupin C të Ligës së Kombeve me dy barazime dhe tri humbje, Anglia do të përballet sonte me Gjermaninë, në ndeshjen e fundit të kompeticionit. Nga edicioni i ardhshëm do të jetë në Ligën B, me synimin pra për t’u ngjitur sërish në Ligën A.
Ish-fituesi i Topit Artë, gjermani Lothar Matthaus, legjenda e Interit mes viteve ‘80-ta dhe ‘90-ta, foli për “The Telegraph” mbi shanset e “Tre Luanëve” për sukses në Katar 2022.
“Kur shihni emrat e lojtarëve, Anglia është favorite për ta fituar Kupën e Botës. Anglia dhe Franca mund të kenë nag tri skuadra kryesore secila. Vendi i katërt në Botërorin e Rusisë, finalja e Evropianit të fundi, anglezët janë shumë afër fitimit të një titulli pas vitit 1966”.
Dyshimi i vetëm i Matthaus lidhet me rolin e portierit, sipas tij jo i barabartë me “luftanijet” e tjera si Gjermania, kundërshtari i radhës i britanikëve.
“Ndoshta Anglia ka një problem me portierin. Fjala vjen, nuk ka një portier si Gjermania. Ky mund të jetë një problem i madh. Në Kupën e Botës ju nevojitet çdo lojtar”, ka potencuar më tej ai. /Telegrafi/