Mediat spanjolle në ditët e fundit janë duke shkruar shumë për shkarkimin e mundshëm të Julen Lopeteguit nga Real Madridi nëse ky i fundit nuk arrin të mposhtë Barcelonën në El Clasicon e fundjavës së ardhshme.
Megjithatë vetë trajneri i ka hedhur poshtë këto akuza, duke thënë se e ka mbështetjen e kryesisë së klubit.
Fillimisht në konferencën për shtyp trajneri i Los Blancos foli për ndeshjen e radhës ndaj Levantes.
“Levante është kundërshtar që është përmirësuar në të gjitha aspektet, ekip që ka fituar dy ndeshjet e fundit, por unë besoj te djemtë dhe te skuadra ime”.
“Ne jemi të përqendruar te ndeshja që kemi nesër, duhet që të fitojmë në fushë, është më e mira që mund të bëjmë për momentin”.
“Kam besim te stafi dhe lojtarët se ne do të bëjmë një sezon të mirë. Jam i sigurt se ne do të bëjmë një sezon të madh. Gjithçka nis nga Levante”.
“Jam i qetë dhe i përqendruar për punën time. Klubi më mbështet”.
“Ne do të përpiqemi të përqendrohemi dhe të luajmë. Duhet që të gjenerojmë shumë, të gjithë duan që të marrin tri pikë që të çojnë në krye të klasifikimit”, ka thënë Lopetegui. /Telegrafi/