Epic ka prezantuar një mjet të ri për dokumentimin e sjelljeve toksike në video-lojën popullore Fortnite.
Lojtarët tani kanë qasje në “raportimin zanor”, i cili regjistron vazhdimisht bisedat zanore në segmente pesëminutëshe, në mënyrë që lojtarët t’i paraqesin ato si provë tek moderatorët kur raportojnë abuzimin. Për të gjithë lojtarët nën moshën 18 vjeç, kjo veçori do të aktivizohet automatikisht.
Sa për lojtarët mbi 18 vjeç, ata do të kenë më shumë kontroll mbi funksionin e ri. Në cilësimet kryesore të video-lojës, mund të zgjidhni opsionin “Gjithmonë ndezur”, i cili do të zbatohet për çdo kanal në të cilin ndodhet, si dhe është gjithashtu opsioni “Off kur është e mundur”, i cili çaktivizon regjistrimin në kanalet me miqtë.
Epic thotë se regjistrimet audio do të ruhen lokalisht në pajisjen e përdoruesit derisa të dorëzohen si provë. Në këtë rast, përdoruesit duhet të jenë të shpejtë, sepse çdo regjistrim i ri fshin automatikisht atë të mëparshëm. Kjo do të thotë se vetëm pesë minutat e fundit të audios mund të raportohen.
Në rrethana normale, regjistrimet audio fshihen automatikisht pas 14 ditësh ose pasi përdoruesi të kryejë veprimin. Nëse lojtari i akuzuar apelon vendimin brenda asaj kohe, pamjet mund të ruhen edhe për 14 ditë të tjera. Sidoqoftë, Epic do të ruajë pamjet për aq kohë sa të jetë e nevojshme dhe nëse kërkohet me ligj.
Një lëvizje e ngjashme është bërë më parë nga Activision, Microsoft dhe Sony në luftën kundër sjelljeve të dëmshme në internet. Këtë vit, Xbox prezantoi një sistem për dërgimin e regjistrimeve audio 60 sekondash me raporte abuzimi në bisedat zanore. /Telegrafi/