Drejtori i Shëndetësisë në Komunë e Pejës, Petrit Loci është shprehur i kënaqur që fshati Llugagji tashmë është larguar nga lista e vendeve që ka banorë të prekur me COVID-19.
Loci në RTV Dukagjini thotë se është lajm i mirë që në mesin e të shëruarve të ditës së sotme janë edhe tri gra shtatzëna që më parë ishin të prekur me COVID-19.
“Ato gra tashmë gëzojnë shëndet të plotë dhe iu urojmë shtatzëni të mbarë”, tha ai, përcjell Telegrafi.
Drejtori i Shëndetësisë në Komunën e Pejës thotë se nga rastet e mbetura aktive katër persona kanë rezultuar negativ në ritestimin e parë e që pritet të shpallen të shëruar pasi të realizohet edhe testi i dytë.
Ndryshe Drejtoria e Shëndetësisë dhe Mirëqenies në Pejë përmes një komunikate ka njoftuar se fshati Llugagji nuk ka më asnjë person të infektuar me coronavirus.
“Gjatë ditës së sotme ekipet mjekësore të IKSHP-së kanë kryer 12 testime prej të cilave 9 ritestime dhe 3 testime për COVID-19, në qytetin e Pejës. Në njoftimin publik të Instituti Publik mostrat e dërguara nga Peja kanë rezultuar të gjitha negative. Nga rezultatet e sotme del se fshati Llugagji nga tash nuk ka asnjë person të infektuar. Peja përherë e me pak me COVID-19”, thuhet në njoftim.
Në Pejë janë regjistruar gjithsejtë 75 raste me coronavirus, dy nga të cilët kanë përfunduar me fatalitet./Telegrafi/