Elon Musk është thirrur në një seancë gjyqësore urgjente lidhur me çmimet prej një milion dollarësh që ai u ka dhënë votuesve të regjistruar në shtetet e fushëbetejës në SHBA.
Shefi ekzekutiv i Tesla dhe X është urdhëruar nga një gjykatës në Filadelfia, Pensilvani të trajtojë një çështje civile nga prokurori më i lartë i qytetit për të ndaluar atë dhe komitetin e tij të veprimit politik, America PAC, që të japin paratë.
Bëhet e ditur se padia akuzon Musk për operim të një llotarie të paligjshme dhe përpjekje për të ndikuar tek votuesit në zgjedhjet presidenciale të javës së ardhshme mes Kamala Harris dhe Donald Trump.
Miliarderi premtoi se do të jepte një milion dollarë çdo ditë për votuesit e regjistruar në shtetet e fushëbetejës, të cilët kanë nënshkruar peticionin e tij për lirinë e fjalës në internet dhe për të drejtat e armëve, shkruan skynews, përcjell Telegrafi.
Siç raportohet, një milion dollarët e parë iu dhanë një burri të quajtur John Dreher gjatë një fushate në Pensilvani më 19 tetor.
Ndryshe, Musk është personi më i pasur në botë dhe ka një pasuri prej 274 miliardë dollarëve, sipas Forbes.
Miliarderi kishte dhuruar 75 milion dollarë për PAC amerikane në periudhën deri në mes të tetorit.
Amerika PAC është një nga disa komitetet kryesore të veprimit politik në SHBA.
Grupe të tilla mund të mbledhin dhe shpenzojnë shuma të pakufizuara parash në mbështetje të kandidatëve politikë, me kusht që të mos koordinohen me fushatat e tyre ose t’u japin para.
Trump ka thënë se do t’i japë Musk një punë në qeveri nëse ai bëhet përsëri president, me Musk që mbështet republikanin në garën për president. /Telegrafi/