Vatikani ka thënë se është duke e hetuar rastin pasi llogaria zyrtare e Papës në Instagram “pëlqeu” një foto të një modeleje braziliane pothuajse të zhveshur.
Sipas BBC, përcjell Telegrafi, mbetet ende e paqartë se kur llogaria zyrtare e “pëlqeu” imazhin e Natalia Garibotto, e cila ishte shfaqur me një veshje uniforme shkolle.
Mediet filluan së pari ta raportojnë rastin para se të hiqej pëlqimi i këtij imazhi në platformë.
Lidhur me këtë rast, zyrtarët në Selinë e Shenjtë thuhet se po e hetojnë rastin për të parë se si mund të ketë ndodhur një gjë e tillë në llogarinë e Papës.
“Ne mund ta përjashtojmë mundësinë që pëlqimi erdhi nga Selia e Shenjtë”, tha një zëdhënës i Vatikanit.
Llogaria zyrtare e Papës në Instagram, e cila është nën emrin e përdoruesit franciscus, ka 7.4 milionë ndjekës nga e gjithë bota.
Burimet pranë zyrës së shtypit të Vatikanit thanë se llogaritë menaxhoheshin nga një ekip punonjësish dhe një hetim i brendshëm tani është në proces. /Telegrafi/