Dukagjini dhe Llapi kanë barazuar pa gola (0-0) në ndeshjen e vlefshme për javën e 18-të në Ipko Superligën e Kosovës.
Llapjanët nuk kanë arritur ta nisin sezonin pranveror me fitore edhe përkundër përforcimeve të shumta në afatin kalimtar dimëror.
Rasti i parë i ndeshjes i takoi vendasve, të cilët rrezikuan me anë të Mark Milicajt (20’), por goditja e tij shkoi shumë afër portës.
Llapi u rikthye në lojë duke rrezikuar me Valmir Veliun (29’) dhe Nertil Hoxhaj (35’), por goditjen e parë e priti portieri Altik Muxhiri, ndërsa e dyta shkoi pranë portës.
Në minutën e 44-të, Dukagjini ishte shumë afër golit, por goditja e Altin Mërlakut u ndal nga shtylla.
Pjesa e dytë nisi më mirë për vendasit, të cilët patën disa gjysmë raste, ndërsa Llapi rrezikoi me Veliun (77’).
Megjithatë, asnjëra skuadër nuk arriti t’i ndryshojnë shifrat dhe ndeshja përfundoi 0-0.
Pas këtij barazimi, Llapi e sheh veten në pozitën e gjashtë me 25 pikë apo vetëm tri më shumë se zonja e mbijetesës, ndërsa Dukagjini renditet i fundit me vetëm nëntë pikë. /Telegrafi/