Llamkos Kosova po kalon momente fantastike këtë sezon. Skuadra bardh e kaltër është komponuar mjaft mirë dhe po arrin rezultate solide.
Nën drejtimin e trajnerit Ismet Munishi, vushtrriasit kanë regjistruar 5 fitore, 3 barazime dhe vetëm 1 humbje, duke i lënë prapa favoritët për titull që konsideroheshin para fillimit të sezonit, Prishtinën dhe Trepçën ’89.
Njohësit e futbollit kosovar konsiderojnë se Llamkosi do të jetë një pretendent serioz për titull të kampionit, duke u bazuar në organizimin e klubit dhe në cilësinë e ekipit.
“Llamkosi ka një ekip mjaft cilësor dhe e ka gërshetuar eksperiencën me të rinjtë. Ka një përbërje shumë të mirë dhe ka arritur rezultate adekuate. Këtë ekip e shoh si njërin prej 4-5 favoritëve për titull këtë edicion”, deklaroi për Express trajneri Ajet Shosholli.
Ai e ka lavdëruar edhe Hysin dhe Ferizajin, të cilët i fut në luftë për titull, krahas Prishtinës dhe Trepçës ’89.
Edhe trajneri Hysni Maxhuni pret shumë nga skuadra vushtrriase, e cila sezonin e kaluar ia doli të shpëtojë pa rënë në Ligën e Parë vetëm në xhirot e fundit të kampionatit.
“Llamkosi ka një organizim të mirë, në aspektin material janë bukur mirë dhe i kryejnë obligime me kohë. Kjo është mjaft e rëëndësishme. Kjo skuadër po ka suksese, pasi është përforcuar me disa lojtarë, ka krijuar stabilitet dhe e shoh deri në fund të sezonit në pjesën lartë tabelës”, theksoi ish trajneri i Hysit.
Sa i përket Hysit, i cili po e bën mrekullinë në nëntë xhirot e para, Maxhuni thotë se skuadra nga Merdara mund të grumbullojë shumë pikë në vjeshtë, ndërsa pret rënie të kësaj skuadre, pasi thotë se nuk e ka bankën e fortë.
E nga Ferizaj pret që ta përfundojë sezonin në njërin nga pesë vendet e para, pasi mendon se ky klub është ambicioz, ka donatorë që janë prapa klubit dhe se ka një trajner shumë të mirë (Bylbyl Sokolin).
Sigurisht, ky është vetëm fillimi i sezonit, pasi deri në fund ka mbetur edhe shumë për t’u luajtur. Por, nëse vazhdon me këtë ritëm të ekipit të pandalshëm, në fund të sezonit qyteti i Vushtrrisë mund ta festojë titullin e parë të kampionit. /Express/Telegrafi/