Lisa Magno sot me një cermoni zyrtare ka bërë betimin si drejtoreshë e misionit të USAID-it në Kosovë.
Në këtë ceremoni, e cila për herë të parë mbahet në Prishtinë, morën pjesë ndihmës administratori i USAID-it për Evropë dhe Euroazi, Brock Bierman, kryeministri Ramush Haradinaj, si dhe zyrtarë të tjerë kosovar dhe të Ambasadës së Sh.B.A-ve në Prishtinë.
Në fjalën e tij, ambasadori Delawie shprehu lëvdata për shkathtësitë profesionale të Magno të treguara gjatë mandatit të saj në Kosovë si zëvendës drejtoreshë e misionit të USAID-it, si dhe në punën e saj të mëhershme me USAID-in në Filipine, Guatemalë, Afganistan dhe më rishtazi në Uashington ku ajo shërbeu në cilësinë e Zyrtares mbikqyrëse të programeve dhe Ushtrueses së detyrës së zëvendës administratores për Zyrën e Europës dhe Euroazisë.
Ambasadori Delawie vuri në pah rolin e USAID-it në zhvillimin e Kosovës përmes partneriteteve të tij me Qeverinë e Kosovës dhe organizatat e shoqërisë civile për forcimin e sistemit politik dhe atij të drejtësisë në vend, ndërtimin e institucioneve stabile, nxitjen e një shoqërie civile dinamike dhe të zhvillimit ekonomik.
Ai shtoi se sheh një të ardhme të ndritur për misionin e USAID-it në Kosovë nën udhëheqjen e Magnos.