Gjykata në Kuala Lumpur e ka liruar nga akuzat indonezianen Siti Ajsija për vrasjen e Kim Jong-nam, gjysmë-vëllanë e liderit të Koresë së Veriut.
Kim Jong-nam kishte vdekur në aeroportin e Kuala Lumpur më 13 shkurt të vitit 2017, kur dy femra i hodhën në fytyrë gazin nervoz VX, transmeton Telegrafi.
E dyshuara Ajsija dhe vietnamezja Doan Ti Huong, janë deklaruar të pafajshme pasi nuk e kanë ditur se do të vrisnin gjysmë vëllanë e Kim Jong-un, duke pretenduar se ishin të bindur se janë duke marrë pjesë në një kamerë të fshehtë të organizuar nga një televizion.
Kamerat e sigurisë kishin filmuar këtë vrasje spektakolare, e cila për muaj të tërë ka qenë kryelajm i mediave botërore. E pas shumë muajve procese gjyqësore, gjykata ka kërkuar lirimin e Ajsijas duke mos dhënë arsye për këtë vendim.
“Jam e lumtur! Nuk e di si ka ndodhur kjo, nuk e kam pritur”, ka deklaruar ajo para gjykatësit.
Siç raporton BBC, duket se janë humbur dëshmitë kundër Ajsijas dhe kështu në mungesë të tyre është liruar. /Telegrafi/
