Liria dhe Vushtrria janë dy klubet ndër më të vjetrat në futbollin kosovar, por vetëm njëra do ta marrë sot një biletë e cila do t’i mbajë në lojë për tu rikthyer në Superligë.
Dy skuadrat e mëdha kosovare përballen mes vete në ndeshjen e barazhit të Ligës së Parë, në një ndeshje që do të zhvillohet në Klinë.
Liria e cila përfundoi sezonin në pozitën e dytë të Grupit A, do të përballet me Vushtrrinë, e cila gjithashtu u pozicionua në vendin e dytë të Grupit B. Ndeshja tejet interesante do të zhvillohet në stadiumin “18 qershori” të Klinës, me fillim nga ora 15:00.
Tifozëritë e të dy skuadrave kanë shprehur interesim të jashtëzakonshëm për këtë ndeshje, andaj pritet spektakël si në fushë ashtu edhe në tribuna.
Skuadra e cila fiton këtë ndeshje, do të përballet me skuadrën e cila përfundon në vendin e tetë në BKT Superligë në barazhin kryesor ku fituesi do ta sigurojë një vend edicionin e ardhshëm në elitën e futbollit kosovar. /Telegrafi/