Prishtina dhe Ballkani kanë luajtur baras 0-0 në kuadër të xhiros së 27-të në Albi Mall Superligë.
Megjithatë vëmendja e skuadrës kryeqytetase është në Kupën e Kosovës, ku në mesjavë do ta zhvillojnë ndeshjen e parë gjysmëfinale, pasi presin Dritën e Gjilanit.
Njëri nga futbollistët më të mirë të Prishtinës, Ardian Limani ka thënë se përkundër që nuk fituan ndaj Ballkanit, kanë zhvilluar një nga ndeshjet më të mira në aspektin taktik.
“Pavarësisht që nuk fituam, mendoj që zhvilluam njërën ndër ndeshjet më të mira në aspektin taktik, e gjithashtu angazhimi ka qenë i jashtëzakonshëm”.
“Nëse luajmë me këtë ritëm, mendoj që jemi të pathyeshëm”, tha Limani.
Ai ka thënë se nëse luajnë në këtë mënyrë edhe ndaj Dritës dhe me mbështetjen e Plisave atëherë do të bëjnë një hap të madh drejt finales.
“E këtë duhet ta dëshmojmë të mërkurën me Dritën, me ndeshje të mirë dhe me mbështetjen e Plisave do të marrim maksimumin e nevojshëm nga ndeshja e parë gjysmëfinale”, tha Limani për faqen zyrtare të klubit. /Telegrafi/