Zëvendëskryeministri në largim i Kosovës, Fatmir Limaj, njëheresh Koordinator Kombëtar i dy qeverive ka mbërritur në orët e vona në Shqipëri, për të vizituar zonat të cilat janë prekur nga tërmeti i fuqishëm.
Kjo është bërë e ditur fillimisht nga një postim i NISMA Socialdemokrate, në të cilin thuhet se Limaj, bashkë me presidentin e Shqipërisë, Ilir Meta, ndodhën aktualisht në Thumanë, në zonën më të goditur nga tërmeti.
“Limaj dhe Meta kanë vizituar banorët të cilët po qëndrojnë në tenda dhe ka ndarë dhimbjen me ta për këtë fatkeqësi të madhe natyrore. Ai ka vizituar forcat speciale të Kosovës të cilët i kanë dalë në ndihmë vëllëzërve tanë nga Shqipëria të cilët i ka përgëzuar për punën dhe përkushtimin”, është shkruar në Facebook.
Ndërsa në një postim të mëvonshëm është bërë e ditur se “kryetari Limaj ka bashkëbiseduar me banorët në Durrës që po qendrojne në tenda”.
Ndryshe, Limaj më herët ka bërë me dije se e ka njoftuar qeverinë shqiptare, dhe se agjencitë e transportit kanë vënë në dispozicion autobusët e tyre për t’i sjellë në Kosovë të gjithë ata qytetarë që vendosin të strehohen në vendin tonë. /Telegrafi/