Kryetari i Nismës Socialdemokrate, Fatmir Limaj, thotë se ftesa për intervistë nga Gjykata Speciale për bashkëluftëtarin e tij Zafir Berisha është në vazhdën e ftesave nga një gjykatë, e cila me kohë është vlerësuar e padrejtë.
Ai në një status në Facebook shkruan se asnjë gjykatë nuk do të arrijë ta njollosë luftën e shenjtë të UÇK-së dhe Zafir Berishës.
Postimi i plotë:
“Ftesa për intervistë nga Gjykata Speciale për mikun dhe bashkëpunëtorin tim, Zafir Berisha, është në vazhdën e ftesave nga një Gjykatë të cilën me kohë e kemi vlerësuar të padrejtë.
Pavarësisht kësaj, asnjë Gjykatë nuk do të arrijë ta njollosë luftën tonë të shenjtë. Unë kam besim në luftën e drejtë të Ushtrisë Çlirimtare të Kosovës dhe të Zafir Berishës.
Jam i bindur se Kosova do ta kalojë me sukses edhe këtë sfidë dhe se drejtësia do të ngadhënjejë përballë shpifjeve”, ka shkruar Limaj. /Telegrafi/
