Kryetar i Nismës për Kosovën, Fatmir Limaj, ka theksuar se “pas një persekutimi të pashembullt për shtatë vjet e 10 muaj, sot erdhi drejtësia në vend”.
Në një konferencë për media, pas shpalljes së tij për të pafajshëm, ai ka thënë se procesi gjyqësor ka qenë i orkestruar nga “individë të cilët, në pamundësi që të ballafaqohen me argumente politike, me punë, angazhim dhe devotshmëri , kanë ndërtuar karrierën në kurrizin e njerëzve të pafajshëm”.
“Ne iu ekspozuam për shtatë vite një persekutimi të pashembullt për shoqëritë e civilizuara dhe për vendet demokratike. Sonte me kënaqësi dal para qytetarëve të Kosovës, për të rikonfirmuar atë që e kam thënë që nga dita e parë: unë, bashkëpunëtorët dhe familja ime ka punuar për vendin kudo që kemi qenë dhe kemi marrë përgjegjësi shtetërore”.
Sipas tij, nga momenti kur është ngritur aktakuza, “ata që e orkestruan rastin e tij, nuk e kursyen nga përbaltja as familjen e tij, përshirë prindërit dhe gruan e tij të vdekur”. /Telegrafi/