Projekti i madh i ardhshëm i Ministrit të Transporteve në Qeverinë e Kosovës, Fatmir Limajt është një Autostradë e cila do të kalojë mespërmes Kosovës dhe do ta lidhë atë me Shqipërinë dhe Serbinë. Është paraparë që këtë punë ta kryen Konzorciumi amerikano-turk Bechtel Enka. Përndryshe edhe Strabagu austriak kishte konkurruar për këtë projekt.
Gjithsesi, Limaj shpreson që Autostrada do të vazhdojë të ndërtohet mëtej edhe në Serbi. "Për pesë apo gjashtë vite", beson ai, "edhe Serbia do ta sheh që është në interesin e saj ekonomik. Autostrada duhet t’u shërbejë popujve".
Limaj beson pokështu që zhvillimi ekonomik është strategjia më e mirë që pjesa veriore e Kosovës, ku jeton një shumicë serbe, mund të integrohet në shtetin e Kosovës. "Njerëzit në veri duhet ta vërejnë dhe ndiejnë pse duhet të jetohet në Kosovë. Unë nuk jam për atë që Kosova ta merr veriun por që veriu të vie vet dhe bëhet pjesë e jugut", ka deklaruar Fatmir Limaj për "Standard".
Ai shprehet për krijimin e zonave doganore të cilat do të tërhiqnin investimet dhe investitorët si dhe për një Universitet Europian në qytetin e ndarë të Mitrovicës, në të cilin do të studionin bashkarisht serbët, shqiptarët dhe romët . Tash për tash nëpunësit e Misionit Europian për shtetin e së drejtës vazhdojnë të gjinden në rrethana jo edhe aq të mira në këtë pjesë të Kosovës.
Limaj pokështu ka folur edhe për një ndryshim rrënjësor të shoqërive që po ndodh në tërë rajonin. "Forcat demokratike janë më të forta sesa forcat regresive. Nëse shikojmë nga e kaluara atëherë vërejmë që diçka e këtillë nuk kishte ngjarë kurrë më parë. Dhe ky është një zhvillim të cilin askush nuk mund ta ndalë më", ka deklaruar Ministri Limaj për "Standard".